الخميس 14 ديسمبر 2017 م - 25 ربيع أول 1439 هـ
  • بنك مصر
  • بنك مصر

حكايات نيللي

حكايات نيللي
2017-08-16 12:00:07

صراع ..
 

يعتبر الصراع النفسي من أقوي وأعنف الصراعات، لأنه حاله كده مؤلمه وغير مريحه بتبقي كلها عباره عن ضغط نفسي وعصبي ممكن توصلنا للإكتئاب والشعور والتوتر والقلق. 
وغالبا بيكون الصراع ده بين الصح والغلط وإنك إزاي تعيش حياتك وتبقي راضي عن نفسك وإزاي تبطل تغلط أو علي الأقل تقلل من الغلط ده .

وبمجرد ماتحاسب نفسك وتفكر من تاني في أحوالك اللي مش عجباك وعارف إنها مش صح تدخل جوا دايره مقفوله وتبقي فيها لوحدك إنت وحياتك اللي مش راضي عنها وتبدأ تفكر وتحتار ياتري أروح علي فين أغير طريقي ولا أكمل فيه وياتري لو غيرته هغيره إزاي وأبتدي منين ولو مغيرتوش وكملت فيه ده في مصلحتي ولا ضدي وهيقضي عليا.
وتلاقي نفسك بتتخانق مع نفسك وبتنازع مع روحك وجواك شخصين بيتكلموا بلسانك واحد عايز يتغير وواحد عايز يكمل وكل واحد من الإتنين دول عنده أسبابه ودوافعه اللي مخلياه عايز يأخد الطريق اللي إختاره.

الشخص الأول شايف إن كفايه غلط وكفايه ضياع وكفايه حاجات كتير ولازم يبقي أحسن ويمشي ع الطريق الصح ويبتدي من جديد ويحاول يكفر عن غلطاته ويلجأ لربنا ويستغفره وينسي اللي فات ويشوف المستقبل بنظره كلها تفاؤل لأنه شايف إن الحياه مش هتدومله وإن الغلط نهايته وحشه وفي الآخر هيبقي هوا الخسران مش حد غيره وبيبدأ يعيد حساباته ويرتب أفكاره ويشوف هيبتدي إزاي .

وفعلا بيقرر إنه يتغير وبينفذ قراره وبيكمل في طريق الصح بكل إراده وقوه ومفيش حاجه بتقدر ترجعه عن المسار الصحيح وده لأنه إستعان بربنا وبالقيم والأخلاق اللي إتربي عليها وإتحدي أي ظروف وإنتصر عليها ورغم إنه بيقابل صعوبات كتير وإغراءات أكتر إلا إنه مصمم يستمر في الصح مهما قابل وشاف ولو وقع بيقوم تاني أقوي من الأول وغالبا الشخص ده بيبقي من أصحاب الشخصيات القويه اللي بتتحدي كل الصعاب ومش بيتأثر بأي ظروف حواليه ولو كان غلط قبل كدا فهو مش عايز يكرر غلطه تاني .

الشخص التاني بقي اللي من جواه بيقول أنا عايز أبقي كويس بس مش بيعمل أي خطوه تساعده إنه يبقي كويس ودايما مستسلم للفشل والضعف والخوف واليأس وشايف إن الحياه جايه عليه وظلماه وإنه ياحرام ضحيه ومغلوب علي أمره ومهما غير من ظروفه هتفضل الحياه زي ماهيا ومش هيحصل جديد.

وعلي الرغم من إنه مش مبسوط بطريقه الحياه اللي هوا عايشها وحاسس بتأنيب الضمير وعدم الراحه إلا إنه مش بيحاول يغير من حياته ولو فكر يحاول بيفشل ومش بيقدر يكمل في طريقه وده لعده أسباب، أولها الظروف المحيطه بيه سواء كانت أشخاص موجوده في حياته أو ظروف إقتصاديه أو مشاكل إجتماعيه وضغوط نفسيه وكل دول بيبقوا أقوي منه ومش بيقدر يتغلب عليهم فبيرجع تاني للدوامه اللي كان عايش فيها ويقع ويقوم وهكذا.

الشخصين دول موجودين جوا كتير مننا وكل واحد فينا هوا اللي بيقرر يختار يبقي مين ويمشي علي خطي مين ونتيجه قرارنا بيترتب عليها حياتنا كلها فهل ياتري هنقدر نسيطر علي نفسنا ونبطل نغلط تدريجيا لحد مانوقف غلط خالص ولا هنتمادي في أخطائنا وفي الآخر نندم ونقول ياريت اللي جري ماكان.

كلنا جوانا خير وكمان كلنا جوانا شر بس إحنا اللي نقدر نزود الخير ونقلل من الشر ومفيش حاجه إسمها غصب عني وأصل ظروفي فيها وفيها وأنا مفيش مني أمل خلاص وعرفت مصيري.

علي فكره مفيش حد يقدر يغصبك إنك تمشي غلط وتعيشها غلط إنت بس اللي عايز السهل من غير ما تتعب وتحارب مع نفسك.

المشكلة إنك عايز يبقي عندك كل حاجه من غير ماتعمل أي حاجه .

إحنا ليه مبقاش عندنا صبر وطولة بال ليه دايما مستعجلين علي كل حاجه؟ ليه بنختار الطريق القصير السهل اللي كله غلط مع إن فيه طريق تاني صح بس أطول وأصعب شويه خلاص بقينا عايزين كل حاجه سهله ومريحه مبقاش عندنا هدف ولا مبدأ.

ياريت نراجع نفسنا ونخلي عندنا مبادئ نعيش بيها أحسن ما الدنيا تضحك علينا كده وتاخدنا معاها في سكه نهايتها مش حلوه.

أُضيفت في: 16 أغسطس (آب) 2017 الموافق 23 ذو القعدة 1438
منذ: 3 شهور, 28 أيام, 7 ساعات, 38 دقائق, 43 ثانية
0
الرابط الدائم
كلمات مفتاحية حكايات نيللى
موضوعات متعلقة

التعليقات

502056
البنك الأهلي المصري
البنك الأهلي المصري